Cyllid Cymru yn buddsoddi yn y cwmni meincnodi band eang byd-eang Epitiro

22/04/08

Mae un o brif arbenigwyr y byd ar berfformiad rhwydweithiau band eang i gynyddu eu cynlluniau ehangu byd-eang yn dilyn buddsoddiad gan Cyllid Cymru.

Mae Epitiro o Gaerdydd yn darparu meincnodi annibynnol ar rwydweithiau band eang, gan ddadansoddi perfformiad megis cyflymder uwchlwytho a lawrlwytho ac amserau cyswllt, ac mae ei restr cleientiaid cynyddol yn cynnwys Ofcom, rheoleiddiwr llywodraeth y Deyrnas Unedig, a’r Commerce Commission, y corff cyfatebol yn Seland Newydd.

Bydd y buddsoddiad gan Cyllid Cymru, sy’n darparu cyllid masnachol i fusnesau bach a chanolig yng Nghymru, yn cefnogi Epitiro wrth iddo gychwyn ar ei gam nesaf o dwf, gan ehangu ei bortffolio a hefyd y nifer o wledydd y mae’n gweithredu ynddynt.

Sefydlwyd Epitiro gan Gavin Johns a JP Curley 2000 ac mae’r cwmni wedi ennill ei blwyf fel ffynhonnell awdurdodol ar ddata cymharol ar berfformiad band eang ledled y Deyrnas Unedig a Seland Newydd. Mae ymchwil y cwmni yn galluogi defnyddwyr, Darparwyr Gwasanaeth Rhyngrwyd a rheoleiddwyr i fonitro perfformiad ac ansawdd darpariaethau band eang ar raddfa genedlaethol a rhyngwladol.

Bydd y cwmni, sy’n seiliedig ym Mae Caerdydd, yn datblygu marchnadoedd yn Ewrop, Asia a’r Unol Daleithiau ac ehangu cwmpas ei ddull Internet Performance Index™, graddiad cymharol ar gyfer Darparwyr Gwasanaeth Rhyngrwyd (ISPs), i gynnwys darparwyr gwasanaeth blaenllaw mewn mwy na 30 o wledydd.

Mae cwsmeriaid megis BT, Orange, Virgin, New Zealand Telecom, Ofcom, Tiscali, Telefonica O2 ac eraill yn manteisio o ddadansoddiad helaeth Epitiro o berfformiad band eang sefydlog a diwifr.

Dywedodd Gavin Johns, Prif Weithredwr Epitiro: “Mae Cyllid Cymru yn coleddu ein hysbryd entrepreneuraidd ac yn rhannu ein huchelgais i ddod yn arweinydd byd-eang ar gyfer dadansoddi cyfathrebu band eang annibynnol. Rydym yn edrych ymlaen at ddefnyddio eu cyllid a’u dawn busnes i alluogi twf rhyngwladol yn organig a hefyd drwy brynu cwmnïau eraill.”

Dywedodd y byddai cynlluniau twf y cwmni, yn cynnwys lansio dadansoddiad chwarae trebl (mesuriad cyfun llais, fideo a band eang) band eang sefydlog a diwifr yn golygu y byddai Epitiro yn brif ddarparydd byd-eang ar gyfer data meincnodi band eang.

Dywedodd Chris Griffiths, Gweithredydd Buddsoddi Cynulliad Cymru, fod Epitiro mewn safle da ar gyfer twf sylweddol.

Dywedodd: “Mae’r wybodaeth a roddir gan Epitiro yn werthfawr tu hwnt ym marchnad fyd-eang heddiw lle mae gan y rhyngrwyd rôl allweddol mewn diwydiant a masnach. Rydym yn falch i gefnogi Epitiro, cwmni seiliedig yng Nghymru sydd ar fin cyflawni llwyddiant byd-eang. Gyda rhestr ragorol o gleientiaid a thîm rheoli profiadol, rydym yn hyderus y bydd y cwmni yn parhau i wneud argraff ar ISPs, rheoleiddwyr a chwmnïau cyfryngau mewn marchnadoedd newydd.”

Mae Cyllid Cymru yn cymryd cyfran leiafrifol yn y cwmni drwy ei fuddsoddiad. Ni ddatgelwyd swm y buddsoddiad.

Y cynghorwyr ar y cytundeb ar gyfer Epitiro oedd Berry Smith Cyfreithwyr. Gweithredodd Kilsby Williams a Geldards ar ran Cyllid Cymru.

Nodiadau i'r golygydd

Epitiro

Mae Epitiro yn darparu data meincnodi perfformiad a phrofiad cwsmeriaid bandeang i ISPs, darparwyr cyfryngau, corfforaethau rhyngwladol a rheoleiddwyr llywodraeth. Caiff nodweddion VoIP, fideo a gwasanaeth rhyngrwyd eu meincnodi drwy ddefnydd helaeth Epitiro o asiantau ISP-I™ gyda’r canlyniadau ar gael drwy wasanaeth tanysgrifio ar-lein neu’r adroddiad rhannol-flynyddol Internet Performance Index™. Mae’r cwmni hefyd yn darparu datrysiadau profi a meincnodi pwrpasol gyda *DataLite™, VocaLite™ ac ISP-I™, gyda’i allu dadansoddi P2P a gwefan.

Sefydlwyd Epitiro yn 2000 ac mae’n brif ffynhonnell gwybodaeth ar gyfer dyfarniadau ISPA (Cymdeithas Darparwyr Gwasanaeth Rhyngrwyd), ac mae’n seiliedig yng Nghaerdydd. www.epitiro.com.

Mae * DataLite™, VocaLite™, Internet Performance Index™ a ISP-I™ yn nodau masnach Epitiro Cyf. Cedwir pob hawl..